Miles Davis

Dr Miles Dewey Davis III. (* 26. Mai 1926 z Alton, Illinois; † 28. Septämber 1991 z Santa Monica, Kalifornie) isch en amerikanische Dschääs-Drumbeeter, -Flügelhornist, Komponist und Bändliider gsi. Mit sim unverwäggselbare Stiil isch er äine vo de iiflussriichste, innowativste und bedütendste Schlüsselfigure vom Dschääs im zwanzigste Joorhundert gsi. Ei isch bi dr sogenannte Bebop-Revoluzion drbii gsi und het denn d Entwigglig vo verschidnige Dschääs-Stiil wie Kuul Dschääs, Hard Bop, modale Dschääs und Dschääsrock maassgäblig beiiflusst. Nid nume as Instrumentalist sondern au dank sine innowative Fähigkäite isch s em Miles Davis glunge, sini äigene künstlerische Ideä z verwirklige und gliichzitig kommerziell erfolgriich z si.

Berüemt isch er scho 1945 worde as Biibop-Dschääser und Säidmän vom Charlie Parker, won er im Parker sinere Bänd dr Dizzy Gillespie ersetzt het. Er het vo denn aa konzepzionell immer wider nöiji Grundstäi gläit, wil er sich nit konserwativ uf äi Dschääs-Stiil festgläit het, sondern immer witer experimentiert het. Er het au die ganz Zit Musiker mit Talänt in si Bänd ghoolt, het vo dene Innowazione und nöiji Impuls erwartet und iine au Ruum zum sich entfalte. E Hufe Dschääsgröössene verdanke eso iire Durchbruch as Musiker dr Zämmenarbet mit em Davis.

Sit em Ändi vom 20. Joorhundert wärde sini Album und Komposizione, wo hüte as Klassiker und Mäisterwärk vom Dschääs gälte, vo Muusigkritiker und Dschääsfäns anerkennt. As bsundrigi Würdigung vo sim Wärk het s Röpresantantehuus vo de Veräinigte Staate am 15. Dezämber 2009 e sümbolischi Resoluzion zum Aadänke an dr 50. Jooresdaag vo dr Ufnaam vom Davis sim Album Kind of Blue verabschiidet, zum „s Mäisterwärk z eere und zum bechräftige, ass dr Dschääs e nazionals Kulturguet isch“.^[1]

1. ↑ Jason Parker: House of Representatives Affirms Miles Davis’ “Kind Of Blue” as National Treasure. Does This Ring Hollow To Anyone Else? In: One Working Musician. 16. Dezember 2009, archiviert vom Original am 16. Oktober 2014; abgruefen am 11. Oktober 2014. .